TORGA, MIGUEL
Cuentos de la montaña ye la so obra esencial. Publicada pela primer vegada en 1941, xira alredor del mundu rural onde nació y que conoz bien, na comarca portuguesa de Trás-os-Montes. Son cuentos poblaos de personaxes fondamente humanos que, como recreaciones del mundu mitolóxicu, viven lligaos a la tierra, a los animales, a los ciclos de reproducción y recoleción. Esti apegu a la naturaleza y a la tierra valió pa que dellos críticos dixeran que na so obra hai un daqué «irracional d'estirpe pagana y mística». Miguel Torga yera l'alcuñu d'Adolfo Correia Rocha. Nació en 1907 en São Martinho de Anta, Vila Real. Foi emigrante en Brasil y, en volviendo, llicencióse en Medicina y establecióse en Coimbra, onde publicó una estraordinaria obra, tanto en calidá como en cantidá. Foi colaborador de la revista Presença (1927) y cofundador d'otres dos revistes, Sinal y Manifesto. Morrió en Coimbra en 1994.
